عزيز البهجاوي يكتب: أجيو نهدرو شوية على السفسطة والسوفسطائيين



من بعد الفلاسفة الطبيعيون الأولون و الفيثاغوريون والإيليون و حتا الطبيعيون المتأخريون ظهرو بعض الأشخاص كيتسماو سوفسطائيون.

* شكون هوما هادو أخويا عزيز؟؟
في النصف التاني من القرن الخامس قبل الميلاد، أثينا جرات على الفرس من  (أبعدت الفرس= دحرت الفرس) من اليونان و حفظت لها الإستقلال ديالها و العقلية ديالها. ديك ساعة الفلاسفة لي كانو، بداو كيكملو في أسباب الحضارة بواحد الطاقات و همم (الهمة) جديدة، داكشي أدى إلى ظهور الشعراء و العلماء و المؤرخون و الصناع و الأطباء والفنانون، هادشي كيعني أن أثينا أصبحت مدينة ثقافية،
 #وحنا_ولات_عدنا_مدينة_إجرامية_هه...(أمزح معكم).
هادشي بدا كيأدي إلى ظهور نظام سميتو الديمقراطية، هاد نظام إلا بغيتي تشد بلاستك فيه وتبان سبع وواعر، خاصك تكون كتمتلك فن الحوار وتكون تتقن الخطابة ويكون عندك مع أساليب المحاجة ( يعني مواجهة الحجة بالحجة) و تكون قادر تجذب الجمهور..

* هادشي كامل أصاحبي ماشي بزاف؟؟
راه قلت ليك أ صاحبي أنه  في داك لوقت ظهرت الديمقراطية، يعني التنافس بين بنادم(الأفراد) كثر بزاف و هادشي غادي يأدي في زيادة أسباب النزاع و خاصة أمام المحاكم الشعبية، وحتا الجدل القضائي والسياسي غادي يكثر. (#شوف_غيرالديمقراطية_ديالا_لمغرب_دابا_مثلا... كلها جدل).. يعني إلى كنتي كتمتالك هاد العجب ديال فن الحوار و كذا وكذا ... غادي تكون بلاستك مضمونة أحبيبي (#بحال_بنكيران_مثلا هههه (أمزح معكم)).
المهم كانو شي وحدين جاو من المستعمرات الإفريقية كانو مثقفين وعقلاء وعندهم معا هادشي لي ذكرنا أعلاه و إستغلوا هاد الموهبة وأصبحوا أساتذة و معلمين بيان.

* شكون هادو؟؟ 
هادو هوما السوفسطائيين أ عشيري، لي كانو من الطبقة الأرستقراطية لي بداو كيقريو الناس وخاصة ولاد لعاقة (أبناء الأسر الغنية) المحامات و يعلمنوهم الخطابة ولباقة الكلام والنزاع اللفظي و كانو هاد السوفسطائيين مولوعين بالجدال و المقارعة (يعني قرع الحجة بالحجة).. كانو كيقريو الناس بالفلوس يعني تعليم الناس و المواطنين الأثنيين كان هو مصدر رزقهم.

* السوفسطائيين وتا قول  ليا شنو كتعني بعدا كلمة سوفسطائي راني كاعما عارفها؟؟
السوفسطائي أ لعشير(ة) كتعني هي المعلم أو ذاك الرجل المثقف الكفؤ ونقدرو نقولو هو الحكيم، وهادشي لي خلاهم يوصفو أنفسهم بالحكماء، هنا غادين نلاحظو البسالة والعياقة ديالهم حيت هوما مغترون بأنفسهم ومتغطرسون بسبب هاديك المواهب لي كانت عندهم، كانو يدعون المقدرة واللباقة في الكلام في أي حاجة كانت و في كل الشؤون، (بحال بعد المغاربة عدنا ، ما فاهمين حتا وزة و باغي يناقشوا و النقاش عندهم هو النزاع و فرض الرأي ديالو).

* زيد زيد أخويا عزيز هضر شوية على هادو المساخيط لي كيفهمو في كلشي؟؟
هاهاهاها ضحكتيني أساط ، المهم هاد القضية ديال كيفهمو في كلشي هيا لي خلاتهم يكونو مجادلين مغالطين، و العجيب هو أنهم كانو يفتخرون بتأييد القول الواحد ونقيضه على السواء، يعني كانو يدعمون الفكرة و يدعمون ضدها أيضا، و أي واحد كان هادا هو الهدف ديالو، هادشي كايعني بأنه لا يبحث عن الحقيقة، كيبحث فقط على وسائل التأثير الخطابي.
كانو يحبون التجول في العالم و يتحولون من مدينة إلى مدينة أخرى، و يقريو بنادم الغني و يتقاضون الأجر الوفير، والشباب منعاودش ليك، كانو يهرعون لعندهم باش يسمع لخطبهم العلنية و دروسهم الخاصة أيضا، حتا ولاو (أصبحوا) بوكو لعاقة(يعني السوفسطائيين). و هادشي غادي يعصب الفيلسوف العبقري سقراط، و هادا موضوع أخر حتا نهضرو عليه في مقال آخر بإذن الله .
المهم هو انهم ملي كانو يتجولون في العالم أول شيء شكو فيه هو الأخلاق الطبيعية بمعنى أخر، أنهم شكو في المبادئ الخلقية والإجتماعية، يعني بداو كيقولو بلي ماكينش شي حاجة سميتها أخلاق فطرية و إنما كلها عادات وتقاليد مختلفة كتختلف من شعب لأخر، لأنهم شافو داك الإختلاف الكبيييير بين الشعوب والفوارق الضخمة في العادات والتقاليد، وبداو كيقولو أ سيدي بلي كاين الحق والباطل، الخير والشر، العدل والظلم ، يعني نسبية الأخلاق، يعني بإختصار نكروا وجود معايير فيما يخص الخير والشر والعدل والظلم والحق والباطل، وهادشي أيضا غادي يعصب الفيسلوف ديالنا سقراط لحقاش هو برهن على وجود معايير مطلقة ومناسبة للجميييييع.
و الشيء لي كانو كيأمنو بيه السوفسطائيين هو أن المعرفة غير ممكنة، يعني المعرفة مستحيل توصل ليها و هنا غادين يبداو يتقسمو السوفسطائيين إلى أصناف، و هادشي حتا هوا خاصو هدرا بوحدو.
صافي فهمتي أولى غير مخاليني داوي بوحدي ؟!!

أه أ صاحبي فهمت، زيد كمل عطيني شي أسماء على هاد السوفسطائيين المساخيط ؟؟
أشهر أعلام السفسطة هما إثنان: #بروتاغوراس و#غورغياس
وبشكل عام  السفسطة تنقسم إلى ثلات أقسام:
#العندية و #العنادية و #اللأدرية 
رأس السفسطة العندية هو بروتاغوراس
ورأس الفلسفة العنادية هو غورغياس
وهادو أخويا (أختي)  خاصنا معاهم ساعات أ باش نهدرو عليهم و نشوفو الفلسفة ديالهم شنو كتقول، وغادي نهدر عليهم من بعد في مقال آخر.
يالاه كنتمنى تكون ستفدتي من هادشي وعجباتك الطريقة باش شرحت ليك.

عن دعوة للتفكير

    تعليقات بلوجر
    تعليقات فيسبوك

0 commentaires:

إرسال تعليق